BUTUAN CITY-Mingulga ang Iran nga mahimong “lehitimong targets” niini ang US bases, mga pasilidad ug assets ugaling mo-atake ang Amerika. Kini taliwala sa gihatag nga deadline ni US President Donald Trump sa Iran nga 10 hangtud 15 ka adlaw aron maka-angkon og nuclear deal.
Gihimo ni Iranian Ambassador to the United Nations Amir Saeid ang maisugon nga pahayag sa usa ka sulat nga gipadala ngadto kang United Nation Secretary General Antonio Guterres ug Security Council president.
Gihisgutan sa sulat ang usa ka social media post ni Trump niadtong Miyerkules, kung asa gibutyag niini nga posibleng kinahanglanon sa US ang mga base militar sa United Kingdom, lakip na ang usa nga anaa sa Indian Ocean Island, ugaling dili makigsabot ang Iran.
Sumala sa Iran Ambassador, ang susamang pamahayag sa US President nagpasabot og tinuod nga peligro sa military aggression, diin ang resulta makadaot sa rehiyon ug posibleng makapahimo og grabe nga hulga sa pangkalibotanong kalinaw ug seguridad.
Una na usab nataho nga nangandam na ang Amerika nga maglunsad og strike sa Iran taliwala sa pagpadala ni Trump og warships, fighter jets ug uban pang military force sa Middle East aron mapugngan Iran gikan sa paghimo og nuclear bomb, buntang nga gilimod sa kampo sa Tehran.
