BUTUAN CITY – Gikumpirma ni International Criminal Court kon ICC spokesman Fadi El-Abdallah sa eksklusibong interview sa Bombo Radyo Philippines nga sa pagkakaron, usa pa lang ka arrest warrant ang ilang na-isyu alang lamag kang kanhi Pangulong Rodrigo Duterte.
Kini matud pa ang hinungdan nga nagpadayon ang ilang imbestigasyon rason nga duna matud pa’y higayon ang prosekusyon aron makapangayo og dugang request ngadto sa mga judges alang sa pagpasaka og kaso sa posibleng uban pang mga suspetsado sa kremin.
Gipasabot usab ni El-Abdallah nga ikonsidera lang nila ang usa ka tawo nga suspek sa kremin hangtud nga duna’y kumpirmasyon sa bisan usa lang ka kaso sama sa kaso karon sa kanhi pangulo.
Giklaro usab niini nga ang tanang defendants duna’y katungod nga muhangyo og interim release alang sa suspetsado ug ang mga huwis na matud pa ang bahala kung ila kining ihatag o dili, depende kung ilang ma-comply ang mga rekisitos nga gikinahanglan.
Gipadayag usab niini nga duna’y katungod ang mga defendant sa mga kasong mu-abot kanila ug ikonsidera usab nilang inosente ang mga suspetsado hangtud nga mapruybahan nga guilty sila sa gi-atubang nilang kaso.
