BUTUAN CITY – Gikumpirma ni Agusan del Sur Vice Governor Patricia Anne Plaza nga hugot nga seguridad ang gipatuman karon sa entiro lalawigan ilabina sa provincial government center aron masiguro nga luwas ang tanang mga delegado ug ang mga manan-aw sa Palarong Pambansa 2026.
Sa esksklusibong pakighinabi sa Bombo Radyo Butuan, gipadayag sa besi gobernador nga nagkatag karon ang ilang mga intelligence agents aron maoy mag-monitor sa tanang mga playing venues og billeting quarters kinsa andam mu-aksyon higayong duna’y madawat nga mga sumbong ilabina kadtong ma-aktuhan nga muhimo og dili maayong buhat.
Gani naka-alert status na ang mga gipang-assign nga ahensya alang sa daling pagresponde ugaling adunay dili kasarangan mga matigayong panghitabo.
Gipasabot usab niini ang hugot nga media accreditation apil sa mga vloggers nga ilang gipatuman aron malikayan ang mga fake news ilabina ang pag-bash sa mga learner athletes nga pulos mga minor-de-edad.
Gibutyag usab ni Plaza, nga gawas sa natalang vehicular accident ning miaging adlaw nga gilambigitan sa mga delegado sa Palaro, wala na’y natala pa nga laing dili maayong insidente.
Alayon niini, madasigong gi-awhag ni Vice Governor Plaza ang katawhan nga mosalmot ug mutan-aw sa Palarong Pambansa 2026 nga moduyog ug musunod lang sa ilang patakaran aron ma-enjoy dili lang ang opening ceremonies kundi lakip na ang uban pang mga kalihokan nga ilang gi-andam.
