BUTUAN CITY – Mag-atubang og mga kasong paglapas sa sections 5 ug 11 sa Article 2 sa Republic Act 9165 ang usa ka inahan human kini nakuhaan og gidudahang shabu atol sa gilusad nga buy-bust operation sa ginsakpan sa Butuan City Police Station 1.
Natigayon kini sa may Purok 2, Brgy. JP Rizal ning siyudad pasado alas-dies kagabii.
Naila ang nadakpang si Cristita Montoya, 45-anyos, single mom sa lima ka mga anak ug residente sa Purok 1, Brgy. Haliobong lungsod sa Jabonga, Agusan del Norte.
Nakuha gikan sa iyang posisyon ang tulo ka sachets sa suspected shabu nga gibana-banang nagkantidad og 35-mil, 400-pesos.
Sa eksklusibong pakighinabi sa Bombo Radyo Butuan, gibutyag ni Montoya nga duha ka semana pa lang siyang mihimo niini nga illegal nga binuhatan.
Na-agni matud pa siya paghimo niini aron duna’y magamit alang sa Christmas party sa iyang mga anak ilabina nga nag-inusara pang siya sa pagbuhi og pagmatuto kanila.
