BUTUAN CITY- Nagdesisyon na ang mga miyembrong nasud sa International Criminal Court (ICC) nga ipadayon ang disciplinary proceedings batok kang Chief Prosecutor Karim Khan kalabot sa mga alegasyong sexual assault.
Sa botohan nga gihimo sa usa ka primary group sa mga miyembro sa ICC, 15 ka nasud ang mingpabor nga ipadayon ang proseso, 2 ang nag-abstain, ug 4 usab ang mingsupak, sumala sa mga source.
Si Khan, nga lider sa imbestigasyon sa mga kasong war crimes, crimes against humanity, ug genocide, kasamtangang naka-leave of absence samtang gi-imbestigahan ang alegasyong non-consensual sexual interaction sa usa ka abogado sa iyang opisina kansa hugot usab nga gilimod ni Khan ang mga alegasyon.
Dungan niini mas ming-init pa ang crisis sa ICC tungod sa isyung gi-atubang sa usa sa pinaka-taas niining opisyal, ug ang mga silog gikan sa Estados Unidos kalabot sa mga aksyon sa korte, lakip ang pagpagawas og arrest warrants batok sa ubang opisyal sa Israel.
Base sa taho sa mga imbestigador sa United Nations, adunay “factual basis” o igo nga basehan ang reklamo sa usa ka babaeng aide batok kang Khan, ug adunay mga testimonya nga mingsuporta sa mga pamahayag niini.
Bisan paman, sumala sa managlahing examination sa tulo ka huwes, dili igo ang ebidensya aron mapamatud-ang tinuod ang alegasyong “beyond reasonable doubt.”
Gipadayag usab sa mga abogado ni Khan nga nagkahi-usa ang mga huwes sa konklusyon nga ‘walay igo nga basehan aron mapamatud-ang adunay misconduct sa katungdanan ni Khan.
