BUTUAN CITY – Misamot pa ang tensyon tali ni Jake Zyrus, kanhi Charice Pempengco ug sa inahan niining si Raquel Pempengco, human sa bug-at nga mga gisulat ni Jake sa librong ‘I Am Jake’. Sa nasangpit nga libro, gibutyag sa kanhi popstar ang gi-ngong pagmolestiya sa iyang uyoan dihang sayis anyos pa lang siya.
Ang mas grabe pa, tungod kay wala matud pa motuo kaniya ang iyang inahan dihang iyang gisumbong ang maong pagpangabuso, hinoon gidepensahan matud pa ni Raquel ang iyang uyoan.
Gumikan niini, gi-ulanan og grabeng pagsaway si Raquel sa social media nga gitubag gilayon niya kini sa mga sunod-sunod nga post sa Facebook ug gitawag pa niini ang libro ni Jake nga usa lamang matud pa ka fake news.
Sunod usab nga nagpagawas og cryptic post si Raquel, butang nga gikasilagan na hinoon sa mga netizens.
Apan ang maong mga pasaring sa inahan, wala na patuli ni Jake. Una nang mibuto sa social media ang mga literal nga pasangil ni Jake sa uyoan niini sa iyang bag-ong release nga libro.
