BUTUAN CITY- Natala na usab ang hugaw nga kalidad sa hangin sa pipila ka lugar sa Metro Manila karung adlawa Biyernes, Abril 17, sumala sa Department of Environment and Natural Resources (DENR).
Base sa monitoring sa DENR-Environmental Management Bureau, ang Punturin sa Valenzuela City nakarehistro og air quality index nga 189 kansa giisip nga “unhealthy.” Parehong sitwasyon ang nakit-an sa Quezon City (Commonwealth Avenue ug Ateneo campus), Marikina, Malabon ug Caloocan.
Giwarningan sa mga eksperto nga ang PM2.5 particles makasulod sa baga ug dugo nga mahimong hinungdan sa seryosong sakit. Ang hinungdan sa dili maayong kalidad sa hangin gitandi sa nagpadayon nga sunog sa Navotas Sanitary Landfill nga nagsugod pa niadtong Abril 10 ug nakaapekto sa 80 porsyento sa lugar.
Sa pagkakaron, wala pa’y klarong timeline sa Bureau of Fire Protection kung kanus-a mapalong ang sunog tungod sa methane gas buildup.
Samtang nanghatag usab ang Department of Health og face masks, vitamins ug tambal sa mga apektado samtang gipasabot ang publiko nga magpabilin sulod sa panimalay, magsuot og N95 mask kung mugawas, ug gamiton ang basa nga panapton aron tabonan ang mga siwang sa balay. Gi-awhag usab ang mga residente nga pwede motawag sa National Emergency Hotline 911 kung kinahanglan og tabang.
