Wala pay final nga desisyon ang House prosecution panel kalabot sa unang pag-share ni Senator-Judge Pia Cayetano sa spliced ug edited nga video kalabot sa nahimong pagtinubagay nila Sen. Alan Cayetano ug Rep. Chel Diokno sa impeachment trial.
Sa pakighinabi sa Bombo Radyo kang Lead Prosecutor Rep. Gerville Luistro, gibutyag niini nga nasayod ang tibuok panel sa gihimo sa senator-judge, lakip ang mga komento ug batikos sa publiko.
Bisan paman, wala pa matud pa nakamugna og pinal nga desisyon o posisyon ang House panel kalabotl sa kontrobersyal nga video.
Sumala ni Luistro, wala pay actual position niini ang House panel, apan nahisgutan na kini sa mga prosecutor sa kasamtangan.
Sa pikas bahin, gisuportahan sa House prosecution panel ang paggamit sa prosecution-defense nga pamaagi sa presentasyon sa ebidensiya sa nagpadayon nga impeachment trial batok kang Vice President Sara Duterte, pinaagi sa pagpresenta niini matag artikulo sa reklamo. Sumala ni House prosecutor Luistro, gipangutana una sa korte ang prosecution ug defense kung mouyon ba sila sa maong pamaagi, ug alang kaniya mas epektibo kini tungod kay dali nga matandi sa mga senator-judges ug sa publiko ang ebidensiya ug mga testigo sa duha ka panig.
Gipasabot usab niya nga kung sundon ang naandang sistema diin mahuman una ang tanang ebidensiya sa prosecution sa dili pa motugot sa defense, adunay posibilidad nga malimtan na sa publiko ug sa mga senator-judges ang mga unang bahin sa paglilitis.
