BUTUAN CITY- Gipasalig na sa House Prosecution panel sa Senate Impeachment Court ang desisyon o discretion kalabot sa dungan nga pag-isbog sa impeachment case ug criminal case ni Vice President Sara Duterte.
Sa exclusive interview sa Bombo Radyo kang House Legal Spokesperson Benjamin Tolosa Jr., napangutana ang abogado sa reaksyon sa House panel kalabot sa pamahayag sa kampo ni VP Sara nga usa ka ‘dangerous precedent’ sa mga impeachable official kung dungan ang pag-uswag sa impeachment complaint ug sa criminal case batok sa bise presidente tungod posible na usab nga makasuhan ug susihon og dungan ang uban pang impeachable official sama sa Presidente, Ombudsman, mga mahistrado sa Supreme Court, ug uban pa.
Sumala ni Tolosa, gipasalig na sa House panel sa local court ug sa impeachment court ang desisyon kung paboran ba ang kampo ni VP Sara nga dili na kinahanglang ipadayon ang criminal case tungod nagpadayon na ang impeachment complaint.
Ang kasong kriminal ni VP Sara nagsugod sa pagpanghulga niini kang President Ferdinand Marcos Jr., First Lady Liza Araneta-Marcos ug presidential cousin nga si Rep. Martin Romualdez, niadtong November 2024.
Ang maong isyu usa usab sa mga grounds o basehan sa impeachment complaint batok kang VP Sara.
Gawas paman niini, sigon ni Tolosa nga lahi ang liability ug quantum of evidence nga gi-atubang sa duha ka managlahing proceedings ugaling dungan nga mo-uswag.
Una nang mingsaad ang kampo ni Duterte nga magpasaka ang mga niini og manifestation aron i-insistar ang panginahanglan nga maghimo og oral arguments sa motion to quash sa bise presidente, tungod dako ug bug-at ang mahimong epekto sa maong mga kaso, dili lang sa akusandi kundi lakip na usab sa uban pang impeachable officials sa nasud.
Sa pikas bahin, mala-umon ang House panel nga walay ‘complete gag order’ taliwa sa unang kritisismo sa defense team ug sa impeachment court sa nahimong post ni Atty. Virgil Ligutan kalabot sa isyu sa misleading questions.
Matud pa niini, kung busalan ang duha ka kampo, paniguradong modaog matud pa ang fake information, hilabi na sa online nga walay nagbantay ug wala na usab gidumala sa korte.
