BUTUAN CITY – Nakadawat si Hollywood star John Travolta og sorpresa nga lifetime achievement award sa Cannes Film Festival atol sa premiere sa unang pelikula nga iyang gidirek.
Ang aktor nga nahimong sikat tungod sa Saturday Night Fever klarong natandog ang emosyon samtang gidawat niya ang honorary Palme d’Or sa wala pa ang screening sa Propeller One-Way Night Coach, nga gibase sa usa ka libro bahin sa iyang unang kasinatian sa pagsakay og eroplano. Sumala pa sa aktor nga dili gyud siya makatoo sa pasidungog nga labaw pa sa Oscar.
Ang festival naghatag usab og dakong pagpasidungog sa mga Hollywood legends karong tuiga bisan wala mitambong ang dagkong studios.
Lakip sa gihatagan og honorary Palmes sila Barbra Streisand ug Peter Jackson, samtang adunay gala screening alang kang Vin Diesel ug sa mga bida sa The Fast and the Furious isip pagsaulog sa ika-25 nga anibersaryo niini.
Si Travolta — nga wala pa gayud makadaog og Oscar — nagpabuhi pag-usab sa iyang karera pinaagi sa iyang iconic nga papel isip hitman nga si Vincent Vega sa pelikulang Pulp Fiction ni Quentin Tarantino, nga midaog sa top prize nga Palme d’Or sa festival niadtong 1994.
Daghang kritiko ang miingon nga kini mao ang labing maayong performance ni Travolta ug usa na karon ka bahin sa kasaysayan sa sine.
