BUTUAN CITY – Gikuptan sa Pilipinas ang pinakapaspas nga pagsaka sa kaso sa Human Immunodeficiency Virus kon HIV sa Asia-Pacific region kondiin daghang bag-ong kaso ang natala matag-adlaw karong tuiga, hinungdan sa panawagan alang sa mas epektibong aksyon sa nasud.
Sumala sa World Health Organization (WHO), ang Pilipinas, Fiji, ug Papua New Guinea gikonsiderang mga nasud nga padayon ang pagsaka sa HIV infections, ug nakasinati sa pipila sa labing kusog nga pagtubo sa rehiyon.
Sa Pilipinas, padayon ang pagsaka sa bag-ong HIV cases, ilabina sa batan-ong lalaking nakighilawas sa isig ka lalaki. Sumala sa Department of Health, kadaghanan sa mga bag-ong kaso, mga lalaking batan-on, nga nagpakita sa paglalin sa epidemya ngadto sa mas batan-ong henerasyon.
Ang sexual contact gihapon ang nag-unang paagi sa transmisyon, ug kadaghanan niini, male-to-male. Bisan pa man nga mikunhod ang porsiyento sa advanced HIV cases, misaka gihapon ang gidaghanon sa namatay, ug kadaghanan niini,mga batan-ong hamtong.
Tungod niini, nanawagan ang mga public health advocates alang sa mas lapad nga testing, edukasyon alang sa kabatan-onan, mas lig-on nga community interventions, ug suporta sa treatment adherence ug viral suppression programs.
