(photo credit: Irish Coquilla Tanasas)
BUTUAN CITY – Mukabat sa usa ka milyon ka pesos ang gibana-banang damyos sa pagkasunog sa sekondaryang tunghaan nga Immaculate Heart of Mary Academy sa lungsod sa Kitcharao, Agusan del Norte kaganinang kaadlawon.
Sigon ni FO3 Efren Cascara sa Kitcharao Fire Station sa pakighinabi sa Bombo Radyo Butuan, ilang nadawat ang fire call pasado alas-12:30 kaganinang kaadlawon kansa narespondehan gilayon nila hinungdan sa pag-abot nila paglabay sa 3-minutos.
Apan tungod kay gama sa karaan nang materyales ang library diin nakitang nagsugod pag-ulbo ang kalayo, dali kining mikanat sa kasikbit nga mga lawak-tunghaan rason sa pagka-abo sa siyam nila ka mga classrooms.
Apil matud pa sa nasunog ang mga computer units, mga libro, mga tables and chairs og mga appliances.
Base sa ilang inisyal nga imbestigasyon, duna matud pa’y duha ka mga magtutudlong nag-overtime paghimo sa ilang test paper sa library kinsa mibiya pagka-alas dose.
Gitu-uhang ang wala mapalong nga wall fan nga gitapot sa karaan nang lawanit nga bungbong maoy gigikanan sa kalayo. (Beth Ruiz)
