BUTUAN CITY – Gisugyot ni Senador Alan Peter Cayetano ang pagpahigayon og snap elections alang sa mga posisyon sa pagka-presidente, bise presidente, mga senador, ug mga kongresista, subay sa nagkataas nga kawalay pagsalig na sa katawhan ngadto sa nasudnong gobyerno. Sumala sa iyang Facebook post, bisan og adunay tinuod nga mga supporters ang mga politiko, apan karong panahona, labaw pa sa tanan, gi-isip pang mga suspek ang maong mga politiko.
Mitumaw ang maong sugyot subay sa mga imbestigasyon sa kurapsyon sa mga proyekto sa flood control, diin gikataho ni Pangulong Ferdinand Marcos Jr. nga 20% sa P545-bilyon nga budget ang napadulong lang sa 15 ka mga kontratista.
Sumala sa Senador, nawad-an na og pagsalig ang mga tawo sa gobyerno ug sa mga opisyal niini, hinungdan nga gikinahanglan ang ka-usaban sa mga government leaders.
Dugang sa senador, ang tinuod nga kausaban magsugod sa radikal nga pagkamatinud-anon ug sa kaisog nga modawat kung kanus-a angayang buhaton ug apil na niini ang pagsakripisyo pinaagi sa boluntaryong pagbiya sa pwesto.
