BUTUAN CITY – Nagpasidaan ang mga medical societies nga ang dugay nga pagtambal sa obesity usa sa mga hinungdan nga nagkadaghan ang mga Pilipino nga nakabaton og sakit sa kasing-kasing, kidney, ug metabolic diseases.
Ang Philippine College of Endocrinology, Diabetes and Metabolism (PCEDM) uban sa Philippine Heart Association (PHA), Philippine Society of Nephrology (PSN), ug Philippine Association for the Study of Overweight and Obesity (PASOO) mipirma og memorandum of agreement aron magtinabangay sa pagsulbad sa problema sa obesity ug sa mga sakit nga nalambigit niini sama sa sakit sa kasingkasing, kidney ug metabolic diseases.
Sumala sa datos, nagkadako ang problema sa obesity sa nasud kondiin mu-abot sa 39.8% sa mga hamtong nga Pilipino ang obese, samtang 17.3% ang overweight.
Kini makadugang sa risgo sa diabetes, high blood pressure (hypertension), ug chronic kidney disease. Importante ang sayong aksyon ug mas kusog nga pagtambal aron malikayan nga mosamot ang obesity ug mahimong seryosong komplikasyon.
Ang obesity dili lang problema sa lifestyle, kundili usa ka chronic disease nga usahay dili tagdon. Mahimo nga kini tungod sa genetics, pamaagi sa pagkaon, ug palibot.
Gitinguha sa grupo nga dasigon ang mga Pilipino nga maghimo og mga lakang aron mapalambo ang ilang panglawas.
Samtang, sumala kang Lourdes Ella Santos sa Philippine Heart Association, mas klaro na karon ang epekto sa obesity bisan sa mas batan-ong mga pasyente.
