BUTUAN CITY – Anaa karon sa ‘dire crisis’ ang health system sa Pilipinas tungod sa kakulang sa batakang serbisyo panglawas nga gikinahanglan sa katawhan, rason nga tabangunon aron matagamtaman sa katawhan ang batakang serbisyong gikinahanglan.
Sa eksklusibong pakighinabi ning sibyahan, gipadayag ni Eleanor Nolasco, National President sa Filipino Nurses United, daghang komunidad ang wala’y saktong primary health services ug kon magkasakit ang mga Pilipino, lisod makadool sa mga government hospitals tungod sa dili dali nga accessibility, taas nga oras sa paghulat, ug dagkong gasto nga gikan sa bulsa sa pasyente.
Gipunting ni Nolasco nga ang kakulang sa suporta sa kagamhanan mao’y hinungdan nga daghang kabus nga Pilipino ang wala makadawat sa hustong serbisyo panglawas nga angay unta nilang ma-angkon.
Dugang pa ni Nolasco, dako pa gihapon ang panginahanglan nga pataason ang health budget sa nasod tungod kay kulang ang alokasyon sa proposed 2026 health budget, nga bisan pa og daw dako tan-awon pundo, dili kini igo sa aktwal nga serbisyong panglawas nga gikinahanglan sa katawhan.
Gitumbok usab niini ang kontrobersiyal nga Medical Assistance for Indigent and Financially Incapacitated Patients Program kon MAIFIP nga gibatikos ni Cardinal Ambo, tungod imbes kay idiretso ang pondo sa mga public hospitals, ma-avail man lamang kini pinaagi sa guarantee letter sa mga politiko.
Kini nagmugna sa nosyon nga daw utang kabobot-on na hinuon sa mga pasyente ang pag-avail niini kansa supak sa hustong serbisyong publiko.
Gihulagway ni Nolasco ang MAIFIP isip dakong scam ug klarong paglapas sa katungod sa katawhan sa pag-avail unta sa maayong serbisyong panglawas, ilabina nga sobra kagamay ang gisugyot nga pondo alang sa maong serbisyo.
