BUTUAN CITY – Gitugotan sa International Criminal Court (ICC) si kanhi Pangulong Rodrigo Duterte nga dili mutambong sa iyang pre-trial hearing sunod semana.
Sumala sa desisyon sa ICC Pre-Trial Chamber I nga gipagawas ning hapuna lang Pebrero 20, magpadayon ang confirmation of charges hearing gikan Pebrero 23 hangtod 27 bisan wala si Duterte sa korte, personal man o pinaagi sa video.
Ang maong hearing dili pa actual trial apan dinhi magdesisyon ang mga huwes kung igo ba ang ebidensya aron ipadayon ang kaso ngadto sa full trial.
Una nang mihangyo ang kampo ni Duterte nga talikdan niya ang iyang katungod sa pagtambong kondiin nagsubmite siya og pinirmahang sulat nga nagbutyag nga nasabtan niya ang iyang katungod ug ang posibleng epekto sa dili pagtambong.
Bisan misupak ang mga prosecutors ug ang mga representante sa mga biktima, nakita sa chamber nga ang waiver ni Duterte misunod sa mga lagda sa korte.
Sigon sa tigpamaba sa ICC nga si Caroline Manuel, ang dili pagtambong ni Duterte base ra sa iyang kaugalingong hangyo ug dili tungod sa kahimtang sa iyang panglawas ilabina nga usa ka grupo sa medical experts ang nakakita nga kaya niya ang pagtambong sa pre-trial.
Apan kung makumpirma ang mga kaso ug mu-abot sa full trial, dili pwede ang trial in absentia tungod kay ubos sa Rome Statute, kinahanglan mutambong si Duterte sa trial.
Kung gusto usab niya nga dili motambong sa laing hearing bahin sa iyang detention sa Pebrero 27, kinahanglan siya magsumite og laing waiver alang niini.
