BUTUAN CITY – Mi-abot sa halos P7,000,000.00 nga kantidad sa usa ka kilo og 20-gramos nga suspected shabu ang nakumpiska sa gipahigayong drug buy-bust operation pasado alas-9:38 kagabii sulod sa sports complex sa Purok 2, Brgy. Libertad ning siyudad sa Butuan.
Ang maong operasyon, miresulta sa pagkasikop sa subject person nga si Emman Roy Cabahug-Basa, 38-anyos, usa ka high value individual, minyo, courier rider ug residente sa Purok 8, Brgy. Ambago ning siyudad sa Butuan.
Nakuha atol sa operasyon ang 17 ka selyadong sachets sa suspected shabu apil na ang usa ka sachet nga maoy buy-bust item; usa ka cellular phone, duha ka tinuod nga tag-usa ka libo ka pisos nga marked money ug 88 ka mga peke nga kwartang papel sa susamang kantidad. Nakuhaan pa siya og mga drug prapheralia ug backpack. Dihang gitimbang ang mga nakumpiskang ilegal nga druga, mi-abot kini sa kantidad nga P6,936,000.00 pisos nga gikostudiya na sa Regional Drug Enforcement Unit-13 uban ang dinakpan.
