BUTUAN CITY – Gibana-banang muabot sa 5-milyones pesos ang damyos sa dakong sunog nga mi-ulbo sa duha ka barangay ning siyudad sa Butuan kagahapong adlawa.
Sigon ni Fire Chief Inspector Peter Paul Montaos, City Fire Marshall sa Bureau of Fire Protection kon BFP-Butuan, alas 4:15 na dihang nadawat nila ang fire call gikan sa may Purok-7, Barangay Ong Yiu nga dali nilang girespondihan.
Apan tungod sa kusog nga hangin, kakulang sa fire hydrant, ug kalisud sa dalan gawas nga gama pa sa light materials ang kabalayan, mas mikusog pa ang kalayu nga mi-ugdaw sa kabalayan sa Purok-9, 10 ug 11 sa maong barangay.
Sa inisyal nga ihap, muabot sa 350 ka panimalay anga gipuy-an sa 1, 750 ka mga indibidwal ang apektado sa sunog sa maong barangay.
Mitabok pa usab ang kalayu sa kasikbit nga Brgy. San Ignacio diin mu-abot sa 100 ka gatus ka pamilya o 542 ka indibidwal ang apektado kauban sa 10 ka commercial nga establisamiento.
Nadeklarang fire control ang maong sunog sa alas 6:30 sa kagabii.
Gikumpirma usab sa opisyal nga gibutang sa pinakataas nga alarma nga Task Force Alpha ang maong insedente nga girespondihan sa 18 ka mga firetruck.
Samtang padayon usab ang imbestigasyon sa hinungdan sa pag-ulbo sa kalayu diin sa inisyal nga mga taho, didto matud pa sa balay ni Bebing Eliquer sa Purok-7, Barangay Ong Yiu diin dunay nagluto og turon nga mga bata.
