BUTUAN CITY – Mohatag ang Australia og halos 1.2 bilyones pesos nga bag-ong maritime assistance sa Pilipinas aron mapakusog ang seguridad sa kadagatan taliwa sa tensyon sa giilogang kadagatan.
Gi-anunsyo kini ni Australian Foreign Minister Penny Wong sa iyang pagbisita sa Maynila.
Lakip sa maritime assistance ang bag-ong drones para sa Philippine Coast Guard (PCG) sama sa underwater drones, counter-drone systems, ug heavy-lift UAVs.
Kauban usab niini ang pagbansay sa mga operator sa drone nga anaa sa 427 milyones pesos.
Anaa sa 770 Milyones pesos ang bag-ong pamuhunan sulod sa upat ka tuig para sa civil maritime assistance.
Doble kini sa mga nakalabay nga tabang alang sa nasud.
Tumong niini nga mapakusgan ang pagbantay sa lapad nga kadagatan sa Pilipinas.
Samtang gibatikos usab sa Australian Foreign Minister ang bag-ohay lang nga pagpahigayon og nuclear-capable submarine-launched missile test sa China gikan sa disputed waters, nga milupad sa kawanangan sa Pilipinas ug mihagsa dool sa mga nasud sa Pacific, isip “provocative ug destabilising.”
Ang pagbisita usab ni Wong sa nasud dungan sa ASEAN chairship sa Pilipinas ug dungan usab sa pag-marka sa ika-80 ka tuig nga diplomatikong relasyon sa Pilipinas ug Australia.
