BUTUAN CITY – Napiling Mutya Hong Butuan 2019 ang garbo sa lungsod sa Tubay, Agusan del Norte nga si Mutya number 14 Gwyneth Amanda Yu Tiamco human mipatigbabaw ang iyang ka-anyag og ka-utukan gikan sa 15 niya ka mga ka-ubanang kandidada.
Kini human ang coronation night kagabii nga gipahigayon sa festival center sa may City Sports Complex sa Brgy. Libertad ning siyudad. Napiling First Runner-Up si Mutya Number 1 Janhea Mae Guinto; 2nd runner-up si Mutya Number 16 Joanne Mae Chica; 3rd runner –up si Mutya Number 10 Alesa Sudario og 4th runner-up si Mutya Number 4 Angela Danes Bringas.
Samtang, mamahimong highlight sa kasa-ulugan sa Balangay Festival karong Dominggo, Mayo 19 ang ‘Lamdag Balangay’ illuminated parade , usa ka float parade nga himuon sa alas-sais sa sayong kagabhi-on.
Sigon ni May Diez – tigpamaba sa Butuan City government, gikan sa pulong nga lamdag, duna’y kahayag ang matag-float nga musalmot kansa magdugang sa ka-anyag sa mga idayan-dayan niini.
Gituyo matud pa kini nga himuon sa alas-sais sa gabii aron maklaro ang ka-anyag sa mga niini nga dili makita kung hayag pa ang palibot.
Una matud pa kining gihimo ning mi-aging tuig og tungod kay daghan ang nakadayeg rason nga na-uyunang usbon kini karong tuiga. Sugdan kini sa may DBP area lahos na sa festival center.
Anaa pa ang street dancing nga sugdan sa susamang lugar kondiin manayaw ang mga contingents og pag-abot sa festival center, himuon usab ang dance showdown.
Maggiya sa gibana-banang napulo ka mga contingents ang pipila ka mga personahe sa city government.
Duna usa’y dagkong premyong naghulat alang sa mga mudaog sa maong kompetisyon.
