BUTUAN CITY – Nagpatuman og granular lockdown ang lokal nga kagamhanan sa Magallanes, Agusan del Norte human nakatala og pinaka-unang kaso sa COVID-19 kagahapon.
Sa eksklusibong pakighinabi sa Bombo Radyo Butuan, gibutyag ni Mayor Bobong Cumba nga human gikumpirma kagahapon ni Governor Dale Corvera ang pagbaton na nila og unang kaso sa COVID-19, dali gilayon silang naghimo og contact tracing samtang naka-isolate na ang nasangpit nga pasyente.
Ipa-ilalom usab sa rapid test ang tanang membro sa iyang pamilya kinsa dili una pagawason sa ilang panimalay sulod sa 14 ka mga adlaw isip kwarantina.
Gawas niini, gibarikadahan na usab ang purok diin nagpuyo ang COVID-19 positive aron ma-monitor ang pagsulod-gawas sa mga tawo sa maong dapit.
Tungod kay mulungtad og lima ngadto sa pito ka adlaw ang granular lockdown, wala’y angayang kabalak-an ang pamilya sa pasyente tungod kay hatagan sila og food packs aron maoy ilang makunsumo sa maong mga adlaw.
