BUTUAN CITY – Gisugyot ni Senador Erwin Tulfo atol sa pagdungog sa Senate Blue Ribbon Committee nga imbitaron sa sunod nilang pagdungog ang Government Procurement Policy Board kon GPPB.
Kini aron makahatag sa ilang pagpasabot kung nganong gihatagan gihapon og flood control project ang MG Samidan Construction taliwa nga na-blacklist na kini tungod sa ilang poor o kaha unsatisfactory performance sa ilang gisudlang mga flood control projects.
Sigon sa senador, base sa guidelines sa GPPB, ang mga contractors nga duna’y poor ingon man unsatisfactory nga Constructors Performance Evaluation System kon CPES rating, dili na tugutang maka-apil o kaha hatagan og proyekto.
Nasayran sa gihimong pagdungog nga ang MG Samidan, gika-ingong duna’y disproportionate share sa ₱545-billion nga flood control budget kondiin taliwa nga duna lamang kini ₱250,000 nga paid-up capital, apan naka-secure kini og 58 ka mga flood control projects nga balor ₱5.02 billion sulod lang sa tulo ka mga tuig.
Apil sa nabasa ni Senador Erwin Tulfo sa mga kompanyang duna’y poor CPES rating ang Equiparco Construction Company nga duna’y branch dinhi sa Butuan City apan wala malakip sa gipadalhan og subpoena sa komite.
