BUTUAN CITY – Hakot awards na usab ang Bombo Radyo Philippines sa ika-40 nga Catholic Mass Media Awards kon CMMA atol sa awarding ceremony kagabii sa Pasay City.
Sigon ni Orly Pangcog – ang senior area manager sa Bombo Radyo Phiilippines, nasakmit sa Bombo Radyo Butuan ang award nga Best Education Program alang sa programang “Good Morning Philippines” nga nagsabak sa Success Story segment kansang host mao kining inyong yanong entry writer og newscaster.
Tungod sa kalipay, napadayag ni Pangcog nga dakong garbo alang kaniya nga nahimong kabahin sa Bombo Radyo.
Samtang gibutyag ni program segment host Bombo Kevin Linaac nga ang midaog nga kaso sa person with disability kon PWD nga si Rodora Fuertes alyas Neneng, residente sa Brgy. Mahay, ning siyudad sa Butuan ang unod sa iyang entry.
Si Fuertes ang unang PWD nga legal nga nibatok sa diskriminasyon diin napamatud-an niyang dunay balaod nga mutabang sa mga mudangop niini.
Nasayrang gi-usab sa tulo niya ka mga silingan ang iyang pangalan gikan sa Rodora “Neneng” Fuertes sa “Neneng Duling” rason sa iyang pagpasaka og reklamo. (Melody Valledor)
