BUTUAN CITY – Mi-abot na sa Bayugan City, Agusan del Sur ang patay’ng lawas sa iladong freelance model ug content creator ingon man Vivamax actress Gina Lima human kini namatay sa Quezon City ning mi-aging semana.
Gipahiluna gilayon ang patay’ng lawas niini sa usa ka punerarya diin nagkatigon ang iyang mga higala, pamilya, ug supporters aron ipa-abot ang ilang kataposang pagtahod.
Kahinumdumang nakit-an ang 23-anyos nga aktres sa usa ka condominium unit sa Quezon City nga wala na’y panimuot ug gidala sa Quezon City General Hospital sa iyang kanhi uyab nga si Ivan Cezar Ronquillo diin siya gideklarang dead on arrival.
Sumala sa imbestigasyon sa Quezon City Police District, wala siya mamatay tungod sa pagpangulata apan nakita sa medico-legal report ang non-fatal external injuries, heart congestion ug congested lungs kansa nagpasabot sa posibleng cardio-respiratory distress.
Samtang wala pa madetermina ang opisyal nga hinungdan sa kamatayon sa aktres hangtod wala pa’y resulta sa toxicology ug histopathology tests. Samtang, nakit-an usab ang patay’ng lawas si Ronquillo sa iyang balay human sa insidente nga naghatag ug dugang komplikasyon sa kaso.
