BUTUAN CITY – Nag-viral karon ang usa ka katingad-an nga lingin nga porma nga makita duol sa hilabihang sekreto nga Area 51 base, kansa nakapukaw og daghang espekulasyon nga basin usa kini ka sekretong landing site sa UFO.
Nakita kini sa Google Earth ug nahimutang mga upat ka milya sa amihanan-sidlakan sa disyerto sa Nevada.
Makita ang dako ug halos perpektong lingin nga porma nga gililok sa uga nga disyerto sa Nevada, diin ang yuta klarong nagkontra sa mas ngitngit nga palibot nga terrain.
Sa tunga niini adunay gamayng taas nga estruktura o bungtod nga naghatag og anino, maong mura kini og dakong target o landing marker kung tan-awon gikan sa taas.
Adunay usab kini gamayng dalan nga yuta padulong diretso sa lingin nga lugar apan kalit lang kini mihunong sa maong estruktura, nga nakadugang sa misteryoso ug hilit nga itsura sa lugar.
Ang hulagway sa maong porma, nga makita sa coordinates nga 37°16’34.5″N 115°45’18.6″W, mikatag sa social media diin adunay mga tawo nga nagbutyag nga mura kini og “alien crash site.”
Bisan pa sa nagkadaiyang teoriya, adunay uban nga social media users nga naghatag og mas realistiko nga panglantaw, nga posible kini usa ka bomb target nga nahimutang sa Weapons Test Range sa sidlakan sa Groom Lake.
Kining matang sa target kasagarang gigamit panahon sa Cold War alang sa weapons testing ug pilot training exercises sa tibuok disyerto sa Nevada. Ang dakong lingin nga lugar sayon kaayo makita gikan sa kahanginan, busa magamit kini sa fighter pilots alang sa bombing practice o sa military crews sa pagsulay sa targeting systems, radar equipment, ug aerial sensors.
Sa sentro sa porma adunay gamayng taas nga butang o bungtod nga posibleng gigamit isip aiming point sa mga eroplano atol sa training missions.
