BUTUAN CITY – Gisugdan na sa Food and Drug Administration kon FDA ang pagdumala sa pagguba sa mga gi-recall nga infant milk formula sa Nestlé Philippines Inc., lakip ang pipila ka batch sa Nan Optipro ug Nankid Optipro.
Sumala sa FDA, ang kontroladong pagguba sa mga produkto nagsugod niadtong Marso 9 ug ipadayon sulod sa pipila ka adlaw n ga gibantayan sa mga representante sa FDA aron masiguro nga sakto ug luwas ang paglabay sa mga produkto.
Base sa report, 330,004 ka units sa apektadong batch ang nahimo kondiin 62 porsiyento niini ang nabawi gikan sa merkado ug karon gigubaubos sa pagdumala sa FDA.
Niadtong Enero, boluntaryong gi-recall sa Nestlé ang pipila ka batch sa Nan Optipro ug Nankid Optipro tungod sa posibleng kontaminasyon gikan sa usa ka ingredient nga gihatag sa ikatulong supplier.
Ang kompanya naghatag usab og tabang sa mga konsyumer alang sa mga pangutana, reklamo, ug para sa pagbalik, pag-ilis, o refund sa apektadong produkto.
Sumala sa FDA, wala pa’y nakumpirmang kaso sa sakit nga nalambigit sa mga gi-recall nga produkto.
Padayon ang koordinasyon sa FDA ug sa mga manufacturers aron masiguro nga ang pagkuha balik ug paglabay sa mga produkto gihimo sumala sa mga regulasyon.
