BUTUAN CITY – Wala’y alamag ang mga ginikanan ni Cadet First Class (Cdt 1stCL) Jeneth Elumba sa Surigao City, lalawigan sa Surigao del Norte nga topnotcher diay kini sa 2024 graduating class sa Philippine Military Academy kon PMA.
Sa eksklusibong interview sa Bombo Radyo Butuan, gipadayag sa amahan niining si Valentino Elumba, usa ka mag-uuma ug punong barangay sa Brgy. Tugbungon, nga na-shock na lang sila sa iyang asawa sa kalampusan sa ilang anak human gipahibalo sa ilang mga silingan nga magna cum laude kini.
Mitawag matud pa ang ilang anak kondiin gisultihan lang sila nga mutambong sa graduation ceremony niini sa Baguio City.
Dugang pa sa amahan, nag-exam usab diay kini sa Philippine National Police Academy kon PNPA ug mas gipili ang pagsulod sa PMA tungod kay kini ang unang mitawag kaniya.
Napili matud pa sa iyang anak nga musulod sa Philippine Military Academy tungod sa kawala nila’y kwartang ikapadayon sa pagungha niini sa kolehiyo kungdiin duha ka tuig na kining nagtungha sa University of the Philippines sa Tacloban City.
Gisaysay pa ni Kapitan Elumba nga anaa na sa ilang kaliwatan ang pagkasundalo gani ang iyang amahan, sundalo matud pa atol sa ikaduhang gubat sa kalibutan samtang siya, nagtungha usab sa kursong criminology apan wala makalampos tungod sa kawala’y igong kwarta nga iyang magamit ilabina sa plitehan.
Samtang si Jenneth usab, nagboluntaryo sa Reserved Officers’ Training Corps kon ROTC dihang nagtungha kini sa kursong accountancy sa University of the Philippines sa Tacloban City.
Na-apil usab sa Top 10 list sa graduating class nila si Cdt 1stCL Kim Harold Gilo gikan dinhi sa Butuan City nga anaa sa rank 3.
