BUTUAN CITY – Walay mahitabong kabag-ohan sa serbisyong hatud sa Philippine National Police, kini ang gipaniguro ni Department of Interior and Local Government (DILG) Secretary Juanito ‘Jonvic’ Remulla human gitanggal sa pagka Hepe sa PNP si PGEN. Nicolas Torre III kagahapong adlawa.
Sigon sa kalihim nga makasiguro ang publiko nga magpadayon gihapon ang mga programa sa Philippine National Police ilabi na alang sa responsibilidad ug trabaho niining mapabilin ang kalinaw, ug kaluwasan sa nasod.
Dugang pa ni Remulla nga taliwala pa man sa kabag-ohan sa liderato, sigurado matud pa gihapong ipadayon ni Philippine National Police Officer-in-charge Police Lieutenant General Jose Melencio Nartatez Jr. ang nasugdan sa gihulipan niining si Torre, rason nga padayon matud pa gihapon ang 9-1-1 Hotline ug ang 5-minute response rule sa polisya.
Samtang, gilimod usab sa kalihim nga duna kini kalabutan sa pagtanggal kang Torre.
Pagklaro ni Remulla nga dili niya kini direktiba, kundili ‘prerogative’ lamang kini ni Presidente Ferdinand Marcos Jr. Lakip sa gihilum una sa kalihim ang rason sa pag-tanggal kang Torre sa pwesto, ug bugtong ang Presidente lamang matud pa ang maka butyag niini.
Depensa pa ni Remulla, walay gilabag nga balaod si Torre. Paukyab lang niini nga duna lang matud pay panag-istorya tali kaniya, sa Presidente, ug ni Torre.
