BUTUAN CITY – Gisalmutan sa mga raliyista ang martsa gikan sa Butuan City Hall padulong sa Guingona Park kagahapong adlawa aron kondenahon ang kurapsyon mahitungod flood control projects ug handumon ang ika-53 nga anibersaryo sa pagdeklara sa Martial Law.
Miihunong pa sila tungod sa buhatan sa Department of Public Works and Highways kon DPWH Agusan del Norte District Engineer’s Office ug gisinggit ang kasuko sa mga “ghost” flood control projects.
Sumala ni Al Cagmat, usa sa mga nagprotesta, gusto nilang ipagawas ug ipadungog nga wala nagpakabuta-bungol ang katawhan ug dili pwede nga magpadayon ang na-andan na lamang nga mga kurapsyon nga ipadayon. Dugang niini, naglantaw ang mga batan-on sa dakbayan sa Butuan, ug nangayo og accountability sa panggamhanan isip parte sa aktibong citizenry.
Samtang gihatagan og gibug-aton sa mga organizers nga ang maong rally, wala magbase sa politika kundi panaghiusa aron pagpangayo og accountability ug pakigbatok sa kurapsyon sa nasud.
Daghang katawhan usab ang mipakita og suporta pinaagi sa pagsirbato sa ilang mga sakyanan. Una nang nagpahayag og ka-andam ang kapulisan sa Butuan, diin sumala ni City Police Director PCol Rommel Villamor, gisiguro sa ilang hut-ong ang pagtinabangay sa mga pwersa sa Stations 1, 2, ug 3.
