BUTUAN CITY – Gisang-at na sa Commission on Audit (COA) ngadto sa Office of the Ombudsman ang ilang mga nakuhang findings kabahin sa upat ka mga gika-ingong “ghost” flood control projects sa Bulacan nga nagkantidad og halos 390 milyones pisos.
Ang mga proyekto nga gilatid naglakip sa mga konstruksyon sa Angat River sa Plaridel, Bocaue River sa Barangay Bambang, ug sa Barangay Bunsuran sa Pandi.
Base sa fraud audit, gipanganlan sa COA ang pipila ka mga kanhi opisyal sa Department of Public Works and Highways (DPWH) Bulacan First District Engineering Office nga posibleng mag-atubang og mga kaso, lakip niini sila District Engineer Henry Alcantara ug Assistant District Engineer Brice Hernandez.
Gi-alegahan sila og paglapas sa Anti-Graft and Corrupt Practices Act, malversation ug falsification of documents, ug kalapasan sa procurement laws. Nasuta sa audit nga ang proyekto sa Plaridel, nga gi-report kansa nahuman niadtong Hunyo 2024, padayon pa diay nga gi-trabaho hangtud karon ug walay ebidensya sa aktwal nga flood control structure base sa satellite imagery. Sa Pandi, gidala ang mga COA auditors sa sayop nga lokasyon nga wala motakdo sa gi-aprubahang project plan.
Samtang sa Bocaue, duha ka proyekto ang gi-flag human nasuta nga aduna na diay existing nga slope protection structures sa lokasyon bisag wala pa magsugod ang opisyal nga konstruksyon.
Gawas niini, nagpagula usab ang COA og Notice of Disallowance tungod sa kapakyas sa ahensya nga makasumite og kumpletong dokumento sa paggasto. Giila sa COA ang daghang mga engineer ug opisyal, apil ang mga opisyal sa TopNotch Catalyst Builders Inc. ug One Frame Construction Inc., nga posibleng responsable sa maong mga kalapasan.
