BUTUAN CITY – Daw nahimo na karong lubnganan sa mga batang Palestino ug sa mga tawong igo nang nangayo og pagkaon, ang kinatibuk-ang Gaza Strip tungod sa paturagas nga pagpamomba sa Israel.
Gipadayag sa hepe sa United Nations Relief and Works Agency for Palestine Refugees kon UNRWA nga nagplano matud pa ang Israel og bangis ingon man Machiavellianscheme nga pagpatay sa Gaza.
Sigon ni UNRWA chief Philippe Lazzarini, sukad niadtong Mayo, mi-abot na sa 800 ka mga Palestino ang napatay samtang nangayo og ayuda.
Ubos matud pa sa ilang pagbantay, nahimo nang lubnganan alang sa mga bata ug mga Palestinong gutom, ang Gaza ug wala na matud pa’y laing kapilian kondili tali lang sa kamatayon ug sa kagutom.
Reaksyon kini ni Lazzarini sa gihimong pagpatay sa Israeli military ngadto sa 15 ka mga tawo apil niini ang siyam ka mga bata ug upat ka mga babaye nga igo lang naglinya ug naghuwat alang sa nutritional supplements sa Deir el-Balah City sa central Gaza kagahapon.
Gipagawas niya ang maong mga komento human nga laing 45 ka mga tawo na usab ang napatay sa Gaza Strip, kondiin 11 sa maong ihap, napatay duol sa aid centre sa Rafah.
