BUTUAN CITY- Mas gamay ang gilauman nga pagsaka sa presyo sa lana sunod semana samtang nagpakita og mga timailhan sa pagluag sa tensyon sa Middle East, sumala ni Jetti Petroleum President Leo Bellas.
Ang diesel gibanabana nga mosaka og P11 hangtod P13 matag litro, samtang ang gasolina gilauman nga mosaka og 50 sintabos hangtod P2.50 matag litro ug ang Kerosene gilaomang mosaka og P3 hangtud P5 matag litro.
Kini mosunod sa halos PHP20 nga pagsaka karong semanaha tungod sa kalihokan sa suplay sa lana.
Sigon ni Bellas nga ang mas ubos nga pagsaka sa diesel ug ang pagluag sa gasolina gipangulohan sa pagkunhod sa presyo sa crude oil tungod sa mga senyales sa de-escalation sa Middle East.
Bisan pa sa paghinay sa pagsaka, nagpabilin nga delikado ang suplay sa lana ug nagpadayon ang panawagan sa gobyerno ug power sector nga magtipid sa enerhiya.
Gitugutan na usab sa Malacañang ang state of national energy emergency aron mas lig-on ang mga lakang sa pagpanalipod sa suplay ug pagtabang sa mga sektor nga pinaka-apektado.
