BUTUAN CITY – Malampuson nga nahatod sa Philippine Coast Guard (PCG) ug Bureau of Fisheries and Aquatic Resources (BFAR) ang fuel subsidy mission para sa mga Pilipinong mangingisda sa Bajo de Masinloc (Scarborough Shoal) karung adlawa Huwebes, Hulyo 23.
Kini bisan paman sa ka-peligro sa harassment ug pagbomba sa water cannon sa China Coast Guard (CCG).
Sa usa ka pamahayag gibutyag ni PCG spokesperson for the WPS Rear Admiral Jay Tarriela nga bandang alas-5:54 sa buntag, midool ang barkong CCG 3302 sa distansyang 50 metros sa atubangan sa BRP Datu Dumangsil.
Pag-abot sa alas-6:29 sa buntag, gitirahan og water cannon ang barko sa Pilipinas sulod sa kapin duha ka minuto.
Bandang alas-6:00 sa buntag, bulag nag mihimo usab og dangerous maneuver ang CCG 21579 diin gibabagan niini ang BRP Datu Paiburong sa distansyang 500 metro.
Nakadawat usab og radio challenge gikan sa mga puwersa sa China ang PCG Cessna Grand Caravan samtang nagpahigayon og maritime domain awareness flight sa lugar.
Bisan paman niini, gikumpirma ni Tarriela nga walay gitahong samaran sa panig sa mga Pilipino ug malampuson nga nahatud sa M/V Mamalakaya ug BRP Datu Cabaylo ang mga krudo ug food packs sa mga bangkang pangisdaay sa mga Pilipino.
Nagpadayon usab sa ilang patrol ug resupply operations ang BRP Datu Sumakwel.
Ang nasangpit nga misyon ang kabahin sa inisyatibang Kadiwa ng Bagong Bayaning Mangingisda (KBBM) aron matabangan ang panginabuhian ug maseguro ang seguridad sa mga lokal nga mangingisda sa West Philippine Sea.
