BUTUAN CITY – Gikumpirma sa Malacañang nga arrestado na si kanhi Presidente Rodrigo Duterte bandang alas 9:22 sa buntag, Marso 11, 2025.
Kini human nadawat sa INTERPOL Manila ang opisyal nga kopya sa mando sa pagdakop kang FPRRD nga gipagawas sa International Criminal Court (ICC) kaganihang kaadlawon.
Sumala sa Presidential Communications Office (PCO), bandang alas-9:20 ang takna sa buntag, Marso 11, 2025, miabot sa nasud si kanhi Presidente Rodrigo Duterte gikan sa Hong Kong sakay sa usa ka commercial flight.
Sa iyang pag-abot, gipahibalo sa Prosecutor General ang ICC notification alang sa mando sa pagdakop batok sa kanhing Presidente tungod sa krimen batok sa katawhan o crime against humanity.
Gisiguro sa PCO nga anaa sa maayong kahimtang si Duterte ug ang iyang grupo, diin gisusi pa sa mga doktor sa gobyerno ang kanhing pangulo aron masiguro nga sila anaa sa maayong panlawas.
Gipasalig sa mga opisyal sa PNP nga aduna silay suot nga body camera atol sa pagsilbi sa warrant aron mapadayon ang transparency sa maong operasyon.
Sa kasamtangan, anaa na ang kanhi Presidente sa kustodiya sa mga awtoridad alang sa tukmang disposasyon.
