BUTUAN CITY – Hingpit nang napasakaan og kasong syndicated estafa sa Criminal Investigation and Detection Group kon CIDG-Caraga ang founder og tag-iya sa FRX Rice Trading kon Forex Trading nga si Dimber de la Cruz Celis iban ang lain pang 16 ka mga indibidwal.
Kini human nga gipanumpaan na sa 27 ka mga Forex investors ang ilang pamahayag samtang ang uban sa 114 ka mga reklamante, padayon pang gikuhaan og testimoniya ang mga reklamante.
Sa eksklusibong pakighinabi ning sibyahan, gibutyag ni CIDG-Caraga regional chief Cholijun Caduyac nga padayon usab ang pagpanguha nila og mga ebidensya aron mas mapalig-on pa ang kasong syndicated estafa batuk sa mga Forex officials kinsa padayon pang gipangita apil ang iyang mga agents.
Ang mga reklamante naggikan pa sa nagkada-iyang mga lungsod sa mga lalawigan sa Agusan del Sur og Agusan del Norte, Butuan City apil na sa Tagum City, Mati City og uban pang mga lungsod sa Davao del Norte og Davao Oriental.
Dugang ni Caduyac, gawas sa syndicated estafa, duna usa’y mipasaka og kasong paglapas sa RA 8799 kon mas nailang Securities Regulation Code of the Philippines.
Pinakadako matud pa nga investor sa Forex, nag-pay in sa Forex og 131-milyunes pesos samtang duna usa’y mga nag-invest og tag-usa ka libo ka pesos kansa ila gihapong gitagad.
