BUTUAN CITY – Kasamtangan nang gipailawom sa forensic analysis nga molungtad sa unom ngadto sa walo ka semana ang narekober nga submarine drone sa kadagatan sa San Pascual, Masbate. Sumala ni Philippine Navy spokesperson for the West Philippine Sea Rear Admiral Roy Vincent Trinidad, nakuha ang submarine nga anaa sa non-operational status.
Duna kini mga kolor nga dalag, pula, ug kahel nga kasagaran matud pang ginagamit sa mga scientific purposes.
Duna kini gitas-on nga 3.5 meters, 24 cm ang diametro ug mitimmbang ngadto sa 94 kilos. Sumala ni Trinidad nga ang ingon niini nga mga equipment kay kalimitan nga ginagamit sa pagpangalap og bathymetric data sama sa water temperature, water depth, ingon man salinity. Sumala usab sa inisyal nga imbistigasyon, commercial designed ug ninggawas nga gilusad kini sa usa ka mother ship.
Base usab sa source, China ang manufacturer niini, apan sumala sa Philippine Navy, kinahanglan pa og hard scientific evidence arun masuta gayud kung diin kini gikan. Samtang, dili matud pa kini ang pinaka unang higayon nga nakarekober og ingon niini nga ekipo ang mga otoridad sulod sa Exclusive Economic Zone (EEZ) sa Pilipinas.
Sumala sa Armed Forces of the Philippines (AFP) nga seryoso ang maong butang ug kinahanglan matud pa nilang sigurohon ang kaluwasan sa teritoryo sa Pilipinas.
