BUTUAN CITY – Padayon karon ang hot pursuit operation sa mga awtoridad aron madakpan ang suspetsado sa pagpamusil nga miresulta sa kamatayon sa usa ka inahan ug pagka-angol sa iyang bana ug anak sa Barangay Halapitan, San Fernando, Bukidnon, pasado alas-10 ning mi-aging gabii.
Sigon ni Police Executive Master Sergeant Rael M. Ganadillo, Chief Investigator sa San Fernando Police Station, personal nga away sa mga silingan ang gitan-aw nga motibo sa krimen.
Pugsanon matud pang misulod sa balay sa mga biktima sa Sitio Sulog ang suspetsado nga nailhan nga si alyas “Gardo” ug gipamusil ang mga biktima gamit ang caliber .45 nga pistola.
Namatay ang inahan nga si Rutchell Lasponia Amad, 32 anyos, human na-igo sa nawong, abaga, ug liog samtang ang iyang bana nga si Jorniel Amad, 34 anyos, ug ilang 12-anyos nga anak nga si alyas “Biboy” nasamdan usab human maigo sa bala sa lain-laing parte sa lawas.
Dali nga mikalagiw ang suspetsado ug gipamusil pa pag-usab ang balay sa mga biktima sa wala pa kini hingpit nga midagan palayo.
