BUTUAN CITY – Nagtuo si kanhi Department of Public Works and Highways kon DPWH Secretary Rogelio Singson, nga gibaboy na pag-ayo ang proseso sa gipangtukod nga flood control projects sa nasud.
Sigon sa kanhi kalihim, kaniadto simple lang ang gi-sunod nga proseso, kondiin ang mga district engineers magkupot lang og proyekto nga adunay pondong hangtud 50 milyones pesos.
Kung mutaas na matud pa ang pondo alang sa usa ka proyekto, ipasaka gilayon kini sa regional office sa DPWH.
Huptan lang usab sa maong opisina ang pundong duna’y 50 hangtud sa 150 milyones pesos nga pundo ug ang tanang proyekto nga adunay taas pa nga pondo, kuptan na sa DPWH Central Office.
Sa maong pamaagi, mas dali nga matudlo kung si kinsa ang adunay tulobagon higayong adunay palpak sa planning, implementasyon ingun man sa paggamit sa nahuman na nga proyekto.
Dugang pa ni Singson, nga ang mga district engineers ang pirmeng duolon sa mga politiko tungod sila man ang unang masayod kalabot sa mga Public Infrastructure Project nga gikinahanglan sa mga partikular nga distrito.
