BUTUAN CITY- Gipa-ambit sa usa ka Pinoy Chief Security sa United Nations High Commissioner for Refugees (UNHCR) Sub-Office ang iyang kasinatian human gisulod sa mga Taliban militants ang ilang compound sa Jalalabad City, Afghanistan.
Sa pakighinabi sa Bombo Radyo Butuan kang Joel Tungal lumad nga taga Pagadian City lalawigan sa Zamboanga del Sur ug 14 ka tuig nang nagtrabaho sa Afghanistan, gi-angkon niini nga mibati siya og grabe nga kulba human gisulod sa mga Talibans ang ilang compound duha ka adlaw human ang pagwithraw sa Estados Unidos sa ilang mga sundalo gikan sa maong nasud.
Pag-asoy ni Tungal, una na niiyang nakita sa CCTV ang pagsulod sa mga Taliban sa ilang compound diin gidis-armahan ang pulis nga naka-duty sa niadtong tungura.
Gihulagway pa niini nga “between life and death” ang iyang kasinatian ug nabati dihang gipatawag na siya sa mga Taliban ug wala matod pa kini nahimo kundi mag-ampo nga dili pasakitan.
Dihang gipangutana na siya sa ga Taliban, gibutyag ni Tungal nga daw gilayong nadungog ang iyang pag-ampo human nga wala siya gihilabtan diyang iyang gibutyag nga usa siya ka Filipino ug gitubag usab niya ang ilang pangutana kalabot sa iyang paglantaw sa mga Taliban.
Sigon ni Tungal, na-ibtan gilayon siya og tunok sa dughan human mipasalig ang maong grupo nga dili nila pasakitan ang mga langyaw nga indibidwal sa Afghanistan.
Gidugang pa niini nga na-uyunan usab sa mga council of elders ug kadagkuan sa kapulisan ug kasundaluhan sa Jalalabad City, Afghanistan nga dili na maghimo og resistance sa ingon nga wala nay mahitabo nga kagubot hinungdan nga dali lang nasulod sa mga Taliban ang maong syudad.
Gihupay usab ni Tungal ang kabalaka sa ubang Pilipino ug sa iyang pamilya tungod kay anaa sila sa luwas nga sitwasyon ug lokasyon sanglit protektado sila sa United Nations. Aduna na usab matod pa kasabutan ang UN ug Taliban nga dili hilabtan ang mga langyaw.
Giangkon usab niini nga dili niini mamahimong biyaan ang iyang trabaho taliwa sa mando nga mandatory repatriation sa gobyerno sa Pilipinas tungod kay kini ang iyang responsibilidad isip kabahin United Nations.
Sa pagkakaron adunay 12 pa ka mga Pinoy ang atua sa Afghanistan diin duha sa mga niini ang padayon pang gipakisayran ang ilang exact location sulod sa Kabul City.
