BUTUAN CITY- Moatubang ang Filipina tennis star nga si Alexandra “Alex” Eala sa usa na usab ka lisod nga pagsulay sa Canadian Open human niini maabot ang Round of 16, diin iyang maka-atbang ang Tokyo Olympics gold medalist ug world No. 14 nga si Belinda Bencic sa Switzerland.
Nakadaog si Bencic batok kang Taylor Townsend sa tulo ka sets aron makaabante, samtang gipildi ni Eala si Caty McNally, 6-3, 5-7, 6-4, bisan pa sa iyang ankle issue.
Kini ang unang higayon nga mag-atubangay si Eala ug Bencic, nga nakaabot na sa world No. 4 sa iyang career ug nakarekord og daghang dagkong resulta sa Grand Slam tournaments.
Mosulod si Eala sa maong duwa nga adunay pito ka sunod-sunod nga kadaugan, lakip ang iyang pagdaog sa iyang unang WTA title sa DC Open, diin usa sa iyang unang gipildi mao si Zheng Qinwen.
