BUTUAN CITY – Mi-abot sa kinatibuk-ang 35 ka mga pamilya kon bugti sa 158 ka mga indibidwal gikan sa Sitio Sumagayad, Brgy Culit, lungsod sa Nasipit, Agusan del Norte, ang pugsanon ug luwas nga napahikling sa Culit Gymnasium kagabii tungod sa flashfloods.
Base sa impormasyon gikan sa Municipal Social Welfare and Development kon MSWD, gipabakwit sila og sugod pasado alas-7:30 pa sa gabii, tungod sa paspas nga pagsaka sa tubig-baha nga milanap gikan sa suba resulta nga wala maagi-i kagabii ang Sumagayad spillway.
Sigon ni Kapitan Elsie Duron, gipahibalo siya ni Kapitan Ireneo Lauro dihang patulog na unta siya tungod sa dakong baha sa ilang lugar nga padagayday na sa mas ubos nga barangay sa Culit rason sa pag-deploy gilayon niya sa iyang mga sakop ug gipabakwit ang mga residente daplin sa suba.
Gani, duna pa sila’y na-rescue nga tulo ka mga bata nga wala sa pinuy-anan ang mga ginikanan human nga wala na makagawas sa ilang balay.
Sa pagkakaron, milurang na ang tubig-baha apan padayon ang monitoring sa suba sa maong barangay apil na sa Jaguimitan ug sa Brgy Kinabjangan nga maoy catch basin sa tubig nga mudagaydagy gikan sa unang duha ka barangay.
