BUTUAN CITY – Gikonsidera nga kawat to the max ni Senador Erwin Tulfo ang anumalusong ₱545.64-B nga flood control projects nga gilambigitan sa mga contractors ug mga hingtungdang kongresista, base sa expose ni Pangulong Ferdinand Marcos niadtong Agusto 11.
Kini ang gipadayag sa senador sa iyang opening statement subay sa pagdungog sa Senate Blue Ribbon Committee sa maong isyu.
Sigon sa senador, dili na kinahanglan pang mupasabot sa pagdungog ang mga resource persons tungod kay duna na sila’y tubag kung nganong kada-tuig, kanunay nga gibaha ang mga komunidad higayong mubundak ang kusog nga ulan.
Gibirahan pa sa senador ang mga nalambigit sa anumalusong proyekto nga samtang gibaha ang katawhan panahon sa kalamidad, ang bulsa usab sa mga nalambigit sa proyekto, gibaha sa kwarta gikan sa buhis sa katawhan.
Giyagyag pa niini ang mga binahinay nga nagakahitabo pagdawat sa kwarta bisan og wala pa masugdi ang proyekto, rason nga 30-porsiento na lang sa orihinal nga pundo ang madapat sa proyekto.
Gisugyot usab ni Senador Erwin Tulfo nga kinahanglang sa pagtunga sa mga contractors nga padalhan og subpoena, duna’y mapresenta nga resonableng tubag sa ilang pag-absent sa pagdungog ning adlawa.
Kinahanglan matud pang mabati sa mga resource persons nga dili nila mahimong bu-angon ang mga Senado sa paghatag lang og mga mabaw nga rason aron lang makalikay sa paggisa kanila.
Sigon ni Senador Erwin Tulfo, dili basta-basta nga balewalaon lang sa mga gi-imbitar nga resource persons ilabina sa mga contractors ang ₱545-B nga gitagang pundo alang sa mga flood-control projects aron kini ibulsa lang ug hatagan lang og sub-standard kaayo nga proyekto ang katawhan.
