BUTUAN CITY – Pabilin pa gihapong naka-hospital arrest si kanhi Nasipit, Agusan Del Norte Vice Mayor Ronald ‘Posoy’ Timogan.
Kini ang gikumpirma ni P/Maj. Edgar Allan Serquiña – hepe sa Nasipit Municipal Police Station sa pakighinabi ning sibyahan.
Nasayran nga niadto pang Septembre 27 sa gabii dihang gidakop ang kanhi besi mayor didto sa iyang panimalay sa Brgy. 3 pinaagi sa warrant of arrest tungod sa kasong syndicated large scale estafa apan imbes nga sa prisuhan, sa ospital kini gideretso tungod sa pagtaas sa presyon sa iyang dugo.
Sigon pa ni PMaj. Serquiña, miadtu sila sa Branch 33, Hall of Justice aron i-uli ang warrant of arrest apan wala kini dawata tungod kay kinahanglan ang pamatood nga na-confine ang suspek.
Dinhe na sila mibalik sa ospital aron mangayu ug certification of confinement apan wala sila hatagi tungod kay kinahanglang ang judge mismo ang mag-request, butang nga wala nila makuha sa rasong out-of-town ang huwes.
Gitambagan usab sila sa piskal nga sundon ang abiso sa doctor.
