BUTUAN CITY – Gipasakaan na og kaso pinaagi sa inquest proceedings si kanhi Association of Barangay Captains kon ABC-Butuan City Federation President Nestor Amora human nga wala makapakita og mga pertinenteng dokumemto nga legal ang pag-transport niya sa 30 ka drums sa mga petroleum products.
Sa eksklusibong pakighinabi sa Bombo Radyo Butuan, gipadayag ni PLCol. Christian Rafols – hepe sa Surigao City Police Station nga nasigpatan sa iyang mga sakop pasado alas-8:30 kagabii si Amora nga nagkarga og petrolyo uban sa lima niya ka mga pahinante sa national highway sa Brgy. Bilang-Bilang, Surigao City.
Sigon ni Col. Rafols, ipatabok na unta as kadagatan padulong sa lungsod sa Socorro, Surigao del Norte ang maong mga produktong petrolyo alang sa iyang gasoline station apan na-abtan kini sa iyang mga sakop ug dihang wala’y napakitang permit to transport gikan sa Bureau of Fire Protection, gi-hold gilayon kini.
Kasong paglapas sa Presidential Decree 1865 ang gipasaka batuk sa mga suspek ilabina nga mga drums lang ang gikargahan niini kansa delikado higayong maduol bisan sa dinagkutan man lang nga sigarilyo.
