BUTUAN CITY – Napatay sa militar sa ilang gilusad nga security operation sa Mexico ang most wanted man ug lider sa gikalisangan nga Jalisco New Generation kon CJNG drug cartel.
Sigon sa ilang defense ministry, napatay si Nemesio Oseguera Cervantes kinsa na-ila sa bansag nga “El Mencho”, sa military operation nga gilusad kagahapon sa lungsod sa Tapalpa, sa central-western state sa Jalisco kondiin pipila usab ka mga CJNG members ang napatay sa maong operasyon.
Nasayrang naka-angkon og grabeng samad-pinusilan si El Mencho atol sa military operation ug namatay dihang gi-air lift padulong sa Mexico City.
Nasayrang milipang ang CJNG gikan sa original power base niini sa Jalisco hangtud sa tibuok Mexico.
Nakumpiska atol sa operasyon ang pipila ka mga armoured vehicles ug mga kagamitan sa panggiyera sama sa rocket launchers samtang tulo ka mga sundalo usab ang angol atol sa maong insidente ug gidala na ngadto sa ospital sa Mexico City alang sa emergency treatment.
Alayon niini, ang US State Department nag-isyu og shelter-in-place warning alang sa ilang mga kababayan nga anaa sa Jalisco State, Tamaulipas State, ingon man sa Michoacan State, Guerrero State, ug Nuevo Leon State.
Gipadayag usab sa Mexican defence ministry nga ang Amerika ang naghatag og mga impormasyon ngadto sa Mexico nga nakatabang sa ilang operasyon.
Gipadayag ni kanhi US ambassador to Mexico ug Deputy Secretary of State Christopher Landau sa social media nga ang kamatayon ni El Mencho, usa ka dakong development alang sa Mexico, sa US, Latin America, ug sa tibuok kalibutan.
Una nang naghanyag ang Estados Unidos og $15m nga reward alang sa makahatag og impormasyon nga musangpot ngadto sa pagsikop ni El Mencho.
