BUTUAN CITY – Simple apan malinawon ang pagsa-ulog sa Eid’l Adha ang gihimo sa mga kaigsu-unang Muslim sa may Purok 11, Brgy. Ong Yiu ning siyudad sa Butuan kaganinang buntag.
Sa eksklusibong pakighinabi sa Bombo Radyo Butuan, gipadayag ni Purok chairman Kamal Cabuatan nga limitado lamang sa 30ka mga tawo ang ilang gipasulod sa moske atol sa pagsimba tungod sa pag-obserba usab nila sa social distancing aron malikayan ang pagkaylap sa gikahadlukang COVID-19.
Ang mga wala makasimba, naminaw na ang sa trumpa diha sa ilang kabalayan aron madunggan ang mensahe sa ilang imam alang sa panaghi-usa sa tanang mga Muslim nga muhimo og kaayuhan alang sa ilang kaugalingon, komunidad, apil na sa atong nasud ug sa tibok kalibutan.
Human sa misa, nag-iyahay na lang ang matag-pamilya pag-andam og pagkaon nga ilang saw-an timaan sa pagsa-ulog nila sa wala pagbiya ni Ibrahim sa iyang hugot nga pagsalig kang Allah bisan og gipangayo niini ngadto kaniya nga ihalad ang iyang anak isip pagsuway sa iyang pagsalig.
