BUTUAN CITY- Malipayon nga gisilibrar ang Easter Sunday mass sa Virgen de la Candelaria Diocesan Shrine and Parish sa Cabadbaran City pinaagi sa usa ka madasiguong prosisyon diin napuno sa mga magtutuo ang kampus sa pag-ampo ug awit, nagpasidungog sa pagkabanhaw sa Ginoong Hesukristo.
Gisundan kini sa Sugat celebration, ang balaang panagtagbo sa nabanhaw nga si Kristo ug sa Mahal nga Inahan, kansa nagpahinumdom nga ang kasubo mahimong kalipay ug ang kangitngit mahimong kahayag.
Ang kasaulogan nagtapos sa balaang misa nga gipangulohan ni Rev. Monsignor. Guy Arnold Pineda, Vicar General, uban sa mga pari nga nag-concelebrate, diin gidasig ang mga kasingkasing sa pagsimba ug pagdawat sa Balaang Eukaristiya.
Ang matag higayon nagpakita sa debosyon, paglaum, ug saad sa bag-ong kinabuhi pinaagi sa pagkabanhaw ni Kristo.
Sa balaang liturhiya, gipasidungog ang kadaugan batok sa sala ug kamatayon, samtang nagmalipay ang Simbahan sa saad sa kaluwasan. Sa pag-ampo ug pag-awit sa pagpasalamat, gipadayag sa mga magtutuo ang kalipay sa Easter.
Gilauman nga kini magbag-o sa pagtuo ug maglig-on sa pagkinabuhi isip mga saksi sa iyang walay kinutuban nga gugma ug kalooy.
