BUTUAN CITY – Nagpabiling usa sa hinungdan sa pagkamatay sa mga Pilipino ang sakit nga diabetes. Sumala sa Department of Health kon DOH, base sa pagtuon sa Philippine Statistics AUthority kon PSA niadtong miang tuig, ika-lima ang sakit nga diabetes sa hinungdan sa mortality sa nasud.
Ang sige ug grabe nga pagkaon ug pag-inom og tam-is, maoy pipila sa hinungdan sa pagtunga sa maong sakit nga musangpot sa komplikasyon sama sa atake sa sakit sa kasing-kasing, stroke, pagkabuta o problema sa panan-aw ingun usab ang pagkaputol sa tiil o ubang parte sa lawas ug kidney failure.
Aron malikayan ang komplikasyon, kinahanglang regular nga magpa-glucose testing, likayan ang mga tambok, mga tam-is, mantikaon ug mga parat nga pagkaon, mag-exercise 30 minuto ngadto sa usa ka oras kada adlaw ug likayan ang panigarilyo, vape ug pag-inom og makahubog nga ilimnon.
Mipahimangno usab ang DOH nga bantayan ang blood sugar ug magpakonsulta sa health center.
