BUTUAN CITY– Muabot na sa halos 14,000 ka pamilya nga apektado sa bag-yong Auring ang nahikling na sa mga evacuation centers sa Caraga Region .
Sa datus nga gipagula sa Regional Disaster Risk Reduction Management Council kon RDRRMC muabot na sa 13,725 ka pamilya o 51,445 ka mga indibidwal ang apektado sa bagyo kansa nahikling na sa 332 ka mga evacuation centers.
Duna usay 84 ka pamiya kon 381 ka mga indibidwal ang gihikling apan wala misiulong sa evacuation centers. Pinakadaghang gihikling nga pamilya nagsumikad sa Surigao del Sur nga miabot sa 7,755 ka pamilya gikan sa 125 ka barangays, gisundan kini sa Surigao del norte sa ihap nga 5,446 ka pamilya gikan sa 80 ka mga apektadong barangays.
Samtang, base sa sa report sa PRO13 Regional Tactical Operation Center (RTOC) anaa sa 27 ka mga lugar ang natahong walay linya sa kuryente, 10 ka areas usab ang walay telecommunication service, ug pito ka areas ang walay radio contact.Wala usab hinuon natahong casualty o na-missing atol sa maong daot nga panahon.
Muabot usab 726 ka mga pasahero ang na-stranded sa mga terminal ning rehiyon lakip na niini ka 255 ka mga pasahero nga kasamtangan natanggong sa mga pantalan ug usa usab ka barko ang naghulat og clearance aron subling makalawig.
Anaa sa kinatibuk-ang 285 ka mga sakyanan ang nataho nga na-stranded samtang tulo ka flights ang kanselado.
Sa pagkakaron passable na usab hinuon ang uban kadalanan sa Agusan del Norte ug Surigao del Sur nga temporaryong giserado tungod sa mibabag nga mga kahoy ug pagdahili sa yuta ug pag-over flow sa tubig.
Apan pabilin pa usab nga dili pa magamit ug maagihan ang Hubo Bridge sa San Agustin Tandag City ,Surigao del Sur tungod sa misakang tubig.
Padayon ang close monitoring sa nagkadaiyang hingtungdang ahesnya uban sa kapulisan ug Local Disaster Risk Reduction and Management Council aron masiguro ang ZERO casualties sa rehiyon subay sa daot nga panahon.
