BUTUAN CITY- Anaa na sa luwas nga lugar ang duha ka mga dalagitang membro sa komunistang grupo nga New People’s Army kon NPA human boluntaryong mitahan sa 75th Infantry Battalion didto sa Brgy. Magroyong, San Miguel Surigao del Sur ning nakalabay nga adlaw.
Naila ang mitahan nga sila alias Je-an, 16 anyos, nagsilbing Medic sa Squad 2, Platoon 2, Guerilla Front 30 (GF30) sa North Eastern Mindanao Regional Committee (NEMRC).
Bitbit niini sa pagtahan ang AK47 Rifle ug upat ka magazines nga loaded sa 50 rounds sa cal. 7.62mm nga bala.
Samtang naila usab ang usa ka surenderee nga si alias Joy, 17 anyos , membro sa Squad 3 sa SRSDG Southland, NEMRC kinsa nagbitbit usab og usa ka AK47 Rifle kansa duna’y duha ka magazines nga loaded sa 11 ka mga rounds of cal. 7.62mm nga bala.
Sa eksklusibong pakighinabi sa Bombo Radyo Butuan, gipadayag ni 4th Infantry ’Diamond’ Division Public Affairs Division Chief Major Francisco Garello Jr., 14-anyos pa lang dihang na-recruit sa walhog kalihukan si alyas Je-Ann rason nga duha ka tuig na siyang nakigbatuk sa kagamhanan human gisa-arang mahimong doktor.
Samtang si alyas Joy usab, na-recruit dihang nagtungha sa ALCADEV dihang siya third year high school.
Mitahan matud pa ang duha ilabina si Je-Ann tungod sa hangyo niini ngadto sa iyang inahan kinsa naguol usab tungod sa kalinghod pa niini nga mi-apil na sa walhong kalihukan.
Dugang ni Major Garello wala’y adlaw og gabii nga dili matud pa maghilak ang inahanni Je-Ann human kini na-recruit sa mga rebelde ug nagdagan-dagan didto sa kabukiran bitbit ang armas. Ang iyang tinguha nga dili mapagan ang iyang anak sama sa uban nga nadakpan o kaha napatay sa engkwentro, maoy nagtukmod kaniya aron makig-alayon sa kasundaluhan.
